କଳାହାଣ୍ଡି : ଜିଲ୍ଲାରେ ଏବେ ପେଟ୍ରୋଲ ଓ ଡିଜେଲ ବିକ୍ରିକୁ ନେଇ ଅସ୍ଥିରତା ଚରମ ସୀମାକୁ ପହଞ୍ଚିଛି। ପୁରୁଣା ସରକାରୀ ଚିଠିକୁ ଆଧାର କରି କେତେକ ପେଟ୍ରୋଲ ପମ୍ପ ଓ ତୈଳ ଟ୍ୟାଙ୍କ ମାଲିକ ସାଧାରଣ ଗ୍ରାହକ, କ୍ରସର ମାଲିକ, ରାଇସ ମିଲ ସଂପୃକ୍ତ ଗାଡ଼ିଚାଳକ ଏବଂ ଠିକା କାମରେ ଲାଗିଥିବା ଶ୍ରମିକମାନଙ୍କୁ ଡିଜେଲ ଦେବାରେ ନାନା ପ୍ରକାର ବାଧା ସୃଷ୍ଟି କରୁଥିବା ଅଭିଯୋଗ ହେଉଛି। ଏହାର ପ୍ରଭାବରେ ଅନେକ ଶିଳ୍ପ, ନିର୍ମାଣ କାମ ଓ ପରିବହନ ବ୍ୟବସ୍ଥା ପ୍ରଭାବିତ ହେବା ସହ ହଜାର ହଜାର ଶ୍ରମିକଙ୍କ ଜୀବିକା ସଙ୍କଟରେ ପଡ଼ିଛି।
ସୂଚନା ଅନୁଯାୟୀ, କେତେକ ତୈଳ ଟ୍ୟାଙ୍କ ମାଲିକ ପୁରୁଣା ସରକାରୀ ନିର୍ଦ୍ଦେଶନାମା ଦେଖାଇ ବଡ଼ ବଡ଼ ଡ୍ରମ କିମ୍ବା ଜେରିକେନରେ ଡିଜେଲ ଦେବାକୁ ଅସ୍ୱୀକାର କରୁଛନ୍ତି। ଯଦିଓ ଅନେକ କ୍ଷେତ୍ରରେ କ୍ରସର ମେସିନ, ଜେନେରେଟର, ଧାନକଟା ମେସିନ, ରୋଡ୍ ରୋଲର, ସିମେଣ୍ଟ ମିକ୍ସଚର ଓ ଅନ୍ୟାନ୍ୟ ଭାରୀ ଯନ୍ତ୍ରପାତି ପାଇଁ ଡିଜେଲ ଅତ୍ୟାବଶ୍ୟକ ହୋଇଥାଏ। ଏହି ଯନ୍ତ୍ରଗୁଡ଼ିକୁ ପମ୍ପକୁ ନେଇ ତେଲ ଭରିବା ସମ୍ଭବ ନୁହେଁ। ତେଣୁ ବ୍ୟବସାୟୀ ଓ ଠିକାଦାରମାନେ ଡ୍ରମ କିମ୍ବା କେନ ମାଧ୍ୟମରେ ଡିଜେଲ ନେଇ କାମ ଚଳାଇଥାନ୍ତି। କିନ୍ତୁ ଏବେ ହଠାତ୍ କଡ଼ାକଡ଼ି ଯୋଗୁଁ ସବୁ କାର୍ଯ୍ୟ ପ୍ରାୟ ଅଚଳ ହେବାକୁ ବସିଛି।
କ୍ରସର ଶିଳ୍ପ ସହ ଜଡିତ ଗାଡ଼ିଚାଳକମାନଙ୍କ କହିବା ଅନୁଯାୟୀ, ଡିଜେଲ ନମିଳିବାରୁ ଗାଡ଼ି ଚଳାଚଳ ପ୍ରଭାବିତ ହେଉଛି। ପଥର ପରିବହନ ବନ୍ଦ ହେଲେ ନିର୍ମାଣ କାମରେ ସିଧାସଳଖ ପ୍ରଭାବ ପଡ଼ିବ। ଏହାସହ ରାଇସ ମିଲ ମାଲିକମାନେ ମଧ୍ୟ ଡିଜେଲ ଅଭାବରେ ଧାନ ମିଲିଂ କାମ ବନ୍ଦ ହେବା ଆଶଙ୍କା ବ୍ୟକ୍ତ କରିଛନ୍ତି। ଗ୍ରାମାଞ୍ଚଳରେ ବିଦ୍ୟୁତ ସମସ୍ୟା ଥିବାରୁ ଅନେକ ମିଲ ଡିଜେଲ ଜେନେରେଟର ଉପରେ ନିର୍ଭର କରେ। ଡିଜେଲ ଯୋଗାଣ ବନ୍ଦ ହେଲେ ମିଲ କାର୍ଯ୍ୟ ସମ୍ପୂର୍ଣ୍ଣ ଅଚଳ ହୋଇପାରେ।
ଅନ୍ୟପଟେ ଠିକା କାମରେ ନିୟୋଜିତ ହଜାର ହଜାର ଦିନମଜୁରିଆ ଶ୍ରମିକ ଏହାର ସର୍ବାଧିକ ପ୍ରଭାବ ଭୋଗିବାକୁ ଯାଉଛନ୍ତି। ରାସ୍ତା, କ୍ୟାନାଲ, ବିଲ୍ଡିଂ ଓ ଅନ୍ୟାନ୍ୟ ନିର୍ମାଣ କାମ ଯଦି ଡିଜେଲ ଅଭାବରେ ବନ୍ଦ ହୁଏ, ତେବେ ଦିନକୁ କାମ କରି ଘର ଚଳାଉଥିବା ଶ୍ରମିକମାନଙ୍କ ଚୁଲିରେ ଆଉ ନିଆଁ ଜଳିବ ନାହିଁ। ଅନେକ ଶ୍ରମିକ କହିଛନ୍ତି ଯେ, “ସରକାରୀ ଚିଠି ଦେଖାଇ ଯଦି ଡିଜେଲ ବନ୍ଦ କରାଯାଏ, ତାହେଲେ ଆମେ ପରିବାର ଚଳାଇବୁ କେମିତି?”
ସ୍ଥାନୀୟ ମହଳରେ ଏବେ ପ୍ରଶ୍ନ ଉଠୁଛି ଯେ, ଯଦି ନିୟମ ଏତେ କଡ଼ା ଥିଲା, ତେବେ ବର୍ଷ ବର୍ଷ ଧରି କିପରି ଡ୍ରମରେ ଡିଜେଲ ବିକ୍ରି ହେଉଥିଲା? ହଠାତ୍ ପୁରୁଣା ଚିଠିକୁ ଆଗକୁ ଆଣି କାହିଁକି ଏହି କଡ଼ାକଡ଼ି ଆରମ୍ଭ ହେଲା? କେହି କେହି ଅଭିଯୋଗ କରୁଛନ୍ତି ଯେ, ତୈଳ ଟ୍ୟାଙ୍କ ମାଲିକମାନେ ନିଜ ସୁବିଧା ଓ ଲାଭ ଦୃଷ୍ଟିରୁ ମନମାନି ନୀତି ଅବଲମ୍ବନ କରୁଛନ୍ତି।
ବୁଦ୍ଧିଜୀବୀ ମହଳର ମତ ହେଉଛି, ଯଦି ସୁରକ୍ଷା ଦୃଷ୍ଟିରୁ କୌଣସି ନିୟମ ରହିଛି, ତେବେ ସରକାର ବିକଳ୍ପ ବ୍ୟବସ୍ଥା କରିବା ଆବଶ୍ୟକ। କ୍ରସର, ରାଇସ ମିଲ, ନିର୍ମାଣ କାମ ଓ କୃଷି କାର୍ଯ୍ୟରେ ଲାଗୁଥିବା ଯନ୍ତ୍ରପାତି ପାଇଁ ବୈଧ ପରିଚୟ ଓ ରେଜିଷ୍ଟ୍ରେସନ ଆଧାରରେ ଡିଜେଲ ଯୋଗାଣ ବ୍ୟବସ୍ଥା କରାଯିବା ଉଚିତ। ନହେଲେ ଏହା ଆଗାମୀ ଦିନରେ ବଡ଼ ଆର୍ଥିକ ସଙ୍କଟ ସୃଷ୍ଟି କରିପାରେ।
ଏନେଇ ଜିଲ୍ଲା ପ୍ରଶାସନ ଓ ଖାଦ୍ୟ ଯୋଗାଣ ବିଭାଗ ତୁରନ୍ତ ହସ୍ତକ୍ଷେପ କରି ସ୍ପଷ୍ଟ ନିର୍ଦ୍ଦେଶ ଜାରି କରିବାକୁ ସାଧାରଣ ଲୋକ, ଶ୍ରମିକ ସଂଗଠନ ଓ ବ୍ୟବସାୟୀ ମହଳରୁ ଦାବି ହେଉଛି।
